Asteotan baltsak preparatzen aritu dira Tolosako gazteak, nor baino nor lehenago iristeko Zumardiarik Zerkausia bitarte, uretan nabigatzen. Guztira, hamabi kuadrillek hartu dute parte. Eta lasterketa bi txandatan banatu dute, txanda bakoitzean sei baltsen arteko lasterketa egin dute.
Sebastopol, Txotxal pauak, 11 kalamidade, Arreme, Oakus, Jaroberik, Breaking news, Zekontatzenk, Bizxigu, Tupuren bila, Sapaburk eta Proyector ziraunera Oriako ur marroian nabigatzen. Kuadrillako gainerako kideak zubietatik txaloka eta oihuka, animoak emanez —asko eta asko gaztelania hutsez—.
Estrategiak edonolakoak izan dira: baltsa beraren prestaketatik hasita, ur korronteari erreparatzea, haize apurrari jarraitzea... Edonola ere, kirola eta festa uztartu dituzte Kuadrillako Eguna abiatzeko. Eta Oria ibaia portatu da gaurkoan, duela astebete zuen itxura kontuan hartuta —euriteek eraginda—, orduan ia pentsaezina zen gaurko eguna ibaian bertan irudikatzea.
Baltsa guztiak Zerkausira iritsi direnean, txupinazoaren txanda izan da. Bonberenea Txarangak alaitu du momentua, eta kalez kale, tabernaz taberna, jarraitu dute gaurko abordatzearekin. Egunak luze joko du. Izan ere, aurretik dituzte kuadrillen bazkaria Euskal Herria plazan, erromeria, Mulambo eta DJ Fresa Morango.