Beste urte batez, Tolosako Iturriza, Harizpe eta Beti Gazteak elkarteek Helduen Eguna antolatu dute. Aurten, bosgarrenez ospatuko dute. Tolosako erretiratuentzat urteko hitzordu nagusia izaten da San Joan jaiak hasi aurretik egin ohi duten festa. Ostiralean izango da, hilak 20, txupinazoaren aurretik.
Goizean, 10:30ean meza egingo dute, San Frantzisko elizan. 11:30ean, berriz, V. Helduen Egunari hasiera emango dion txupinazoa botako dute Alondegi plazan. Ondoren, kalejira egingo dute herrian zehar. 14:00etan, Zerkausian elkartuko dira bazkaria egiteko, eta sabela berdindu ondoren, dantzaldia egingo dute, egunari amaiera emateko.
Bihar, karta jokoak
Ostiraleko festaren aurretik, bihar, XV. San Joan Mus Txapelketa jokatuko dute Iturriza jubilatuen elkarteko bulegoan, 10:00etan hasita. Mus txapelketa azkarra izango da, lau erregetara. V. San Joan Puntxo Saria ere antolatu dute. Bietan ere, Iturriza, Harizpe edota Beti Gazteak elkarteetako kideek parte hartuko dute.