Hirurehundik gora saskibaloi jokalari elkartuko dira bihar Tolosan jokatuko den saskibaloi txapelketan. Aurtengoan 25. urteurrena du TAKE klubak antolatzen duen lehiaketak, eta Ugaitz 3x3 San Joan Saskibaloi Txapelketa izena jarri diote, klubeko jokalaria zen eta orain gutxi zendu zen gaztearen oroimenez.
Bi txapelketa jokatuko dira. Gaztetxoena, alebin eta infantil mailakoena, goizean jokatuko da Alondegia plazan. 30 talde lehiatuko dira eta 09:00etatik 13:30ak ingurura arte ariko dira lehiatzen. Kuadrillen artekoa San Frantzisko ibiltokian jokatuko da, 15:30ean hasita. Emakumezkoen eta gizonezkoen txapelketak izango dira jokoan, eta guztira 50 taldek eman dute izena. Finalak 20:00ak aldera hastea espero dute.