Asuncion Klinikako enpresa batzordeak bat egin du TOPAren larunbateko deialdiarekin, eta herritar oro deitu du mobilizazioan parte hartzera.
Gogoratu dutenez, Eusko Jaurlaritzak Tolosan ospitale publikoa eraikitzea erabaki zuen 2019an, eta ondoren, 2023an plan funtzional bat aurkeztu zuen. Bada, plan funtzional hori «labur» geratzen da euren ustez: «ez du garbiketa-zerbitzua aipatzen, ezta sukaldea ere; ospitaleratzea ekarriko lukeen kirurgia beste ospitale batzuetara bideratuko da, eta ez da egongo pediatriako larrialdirik ezta obstetriziarik gabe». Hori erreferentziazko eskualdeko ospitale bat izatetik «oso urrun» geratzen dela uste dute. Era berean, planak ez duela Asuncion Klinikako langileekin zer gertatuko den aipatzen ere salatu dute.
Hori dela eta, Eusko Jaurlaritzari hasierako plan funtzionala baztertzeko eta euren aldarrikapenak —%100 publikoa den ospitalea, zerbitzu guztiak dituena eta Asuncioneko langileak subrogatzea— kontuan hartzeko eskatu diote. Era berean, Osasun sailburuari eskatu diote euren eskariari erantzun eta bilera batera deitzeko.