Berazubi estadioan dauden tenis pisten zorua aldatzeko lanak abiatu zituzten atzo. Bi pista konponduko dituzte: bata Paper kalearen alboan dagoena, eta bestea, ibaiaren aldekoa. Azken horren alboan saskibaloian jokatzeko dagoen guneko zorua ere aldatuko dute.
Lehenik eta behin materiala garraiatu eta lanak abiatzeko egokituko dituzte guneak; ondoren, zorua altxako dute, eta horren ondoren hasiko dira berria egiten. Gutxi gorabehera hilabeteko epea beharko dutela lanak egiteko aurreikusi dute, eta denbora horretan ez dira erabilgarri egongo pistak. Tolosako Udaletik esan dutenez, gainerako instalazioen erabiltzaileei ez diete eragingo lanek, nahiz eta unean uneko afekzioren bat egon daitekeen.
Tolosako kirol instalazioen kudeaketarako kontratua deuseztu zen unean egiteke geratu zen inbertsioetako bat da tenis pistena. BPXport, kontratu haren enpresa emakidadunak, inbertsio horiek guztiak gauzatzeko konpromisoa hartu zuen. Bada, udalarekin eta Kirolzer enpresa kudeatzaile berriarekin horrela adostuta, egiteke zeuden bi lanak atzeratu ziren: Beotibar pilotalekuko sarea berritzearena (otsailean egin zen), eta tenis pisten zorua aldatzearena. Azken lan honetarako eguraldi lehorragoetara itxaron dute lanekin abiatzeko.