Oria eta Araxes ibaien ertzetatik hondakinak garbitzeko lanak abiatu zituzten atzo, Tolosan. Martxoan, hiru ikastetxeetako ikasleek egin zuten garbiketa; orain, berriz, haiek iritsi ezin diren puntuetako hondakinak biltzen eta beste zenbait eremu garbitzen ari dira. Astebete inguru arituko dira lanean, guztira sei puntutan: Aldabatxiki auzora doan bidearen alboan, Olarrain auzoan, Usabal industriagunearen inguruan, Berazubi inguruan, Andre Maria elizaren atzealdean, eta Belatetik Donostia etorbiderainoko tartean.
Aldi berean, Oria ibaiaren herriguneko landare inbaditzaileen kartografia eguneratuko du udalak, Aranzadi Zientzia elkartearekin batera. Aurrera begira, informazio hori erabiltzea da asmoa, kendu daitezkeen landare horien erauzketa lanak egiteko. Erauzketa, baina, uda partean egingo da, landareak loratuta egoten direnez, aproposagoa baita garai hori.
Udalak adierazi duenez, espezie horiek erauztea «funtsezkoa» da, uretako ekosistemak babesteko eta oreka ekologikoari eusteko. «Inbaditzaileek bertako landaredia kanpora dezakete, habitat naturalak aldatu eta ziklo hidrologikoei eragin. Horrek zuzenean eragiten die uraren kalitateari, biodibertsitateari eta ibaiertzen egonkortasunari», azaldu dute. «Landare inbaditzaileak desagerrarazteak, ibaietako ekosistemen osasuna leheneratzen laguntzeaz gain, hainbat arazo prebenitzen ere laguntzen du; hala nola uholdeen aurrean babesa eskaintzen du, eta higadura murrizten ere lagundu dezake», gaineratu dute.