TAK Arrauneko kadete mailako trainerillak Espainiako Txapelketa irabazi du, eta senior mailakoek bigarren postua lortu dute. Euskadiko zein Gipuzkoako txapelketetan lortutakoa berdindu dute bi ontziek.
Kadete mailako Tolosaldea trainerillak (7.57,76) txapelketa alde nahikoarekin irabazi zuen, bigarren egin zuen Zumaiari (8.06,53) ia bederatzi segundoko tartea ateraz. Hirugarren Isuntza izan zen (8.11,12) eta A finaleko laugarren postuan Boiro helmugaratu zen (8.17,07).
Senior mailako Tolosaldeak estropada ona egin zuen, eta bigarren sailkatzea lortu zuen 15.29,19ko denbora eginez. Lehenengo postuan Astillero iritsi zen (15.20,38), hirugarrena Chapela izan zen (15.35,34) eta laugarren postuan Robaleirak amaitu zuen (15.59,50).
Iberdrola Supera Saria
TAK Arraun klubak Iberdrola Supera Saria jaso du, eta Espainiako Txapelketan parte hartzen ari zela eman zioten. Kirolaren bidez genero berdintasuna bultzatzen dutenei ematen zaie sari hori, eta urtero banatzen da.
Argazkiak: Iban Ormazabal