Tolosako Udalak bilera erronda abiatu du Emeterio Arrese udal eraikina erabiltzen duten elkarteekin, elkar ezagutu, behar berriak identifikatu eta erabileran hobekuntzak txertatzeko. Udalaren asmoa da bilerekin uztailean amaitzea.
Lehen saioetan, erabiltzaileek ekipamendua nola bizi duten ezagutzen eta beharrak identifikatzen ari dira. Ondoren, egungo dinamika, funtzionamendu eta ezaugarrietatik zer mantendu eta zer hobetu nahiko luketen landu nahi dute. Amaieran, asmoa da etorkizunean nolako egoitza nahiko luketen irudikatzea, eta horri begira urratsak ezartzea eta proposamenak egitea.
2010ean, egoitzan hutsik zeuden lokalen beharrak identifikatu ondoren, haiek egokitu eta izaera sozialeko eragile eta elkarteen eskura jarri zituen udalak. Eraikina bera eta erabilera aldatu egin dira orduz geroztik, eta egun, hamabost elkartek erabiltzen dute. Besteak beste, Harizpe, Beti Ikasten, Afagi, Gipuzkoako Minbiziaren Aurkako Elkartea, Adinkide Booloo Senegal, Duintasuna eta Gainditzenek dute egoitza bertan.