Ertzaintzak 25 urteko gazte bat atxilotu du Tolosan, adineko bati bortizki lapurtzea egotzita. Jakinarazi dutenez, gertakariak ostegun goizaldean izan ziren, 06:15 aldera, Tolosako Laskoain kalean. Ertzaintzak adierazi duenez, biktima bere etxera itzultzen ari zen, paseo bat eman ondoren, eta orduan, gazteak atzetik eraso zion, eta dirua lapurtu zion, lepoa indar handiarekin estutuz asfixia eragin bitartean.
Biktimak Ertzaintzari emandako informazioarekin, ikerketa abian jarri zuten, eta egun berean, erasoaren eta lapurretaren egilea aurkitu eta atxilotu zuten, bere etxean.
Bi aldiz aste berean
Handik gutxira, agenteak ohartu ziren atxilotuak aurrekariak zituela, gisa bereko delituengatik; izan ere, maiatzaren 20an, asteartean, antzeko ezaugarriak zituen lapurreta bortitz batengatik atxilotuta egon zen. Azkenean, atxilotua Ertzaintzaren bulegoetara eraman zuten beharrezko eginbideak egiteko, eta, ondoren, epailearen esku utzi zuten.