Iaz antolatu zuen lehenengoz San Joanetako arraun txapelketa Tolosako Gazte Asanbladak (TGA) eta, aurten, bigarren edizioarekin datoz. Ekainaren 20ean izango da ekitaldia eta izena emateko epea dagoeneko zabalik badago ere, igandea —hilaren 25a— izango da horretarako azken eguna.
Izena taldean zein banaka eman daiteke, baina antolatzaileek zehaztu dute hobea dela lauzpabost kide bildu eta izena taldean ematea. Izena emateko informazio osagarriarekin esteka bat prestatu du asanbladak.
Entrenamendu saioak
Lehiaketa ekainaren 20an egingo badute ere, aurretik entrenatzeko saioak ere prestatu dituzte, hain zuzen, ekainaren 3an, 5ean, 10ean, 12an, 17an eta 19an. Antolatzaileek nabarmendu dute entrenamendu egunak moldatu daitezkeela, eta txapelketan parte hartzeko lehiakide bakoitzak gutxienez bi aldiz entrenatu beharko duela.