Liga hirugarren bukatu zuten tolosarrek, eta lehenengo lauak pasatzen ziren azken fasera. Finalerdia bigarrengoaren aurka jokatu zuten Hondarribian, Harresi taldearen aurka. Lehenengo seta galdu egin zuten, baina hurrengo hirurak irabazteko gai izan ziren. «Beraien aurka jokatutako aurreko partida nahiko eroso irabazi genion, eta bagenuen partida irabazteko konfiantza», azaldu du Toloboleiko Ane Gorostegi jokalariak. «Baina lehenengo seta irabazi zigutenean, aldapa gora jarri zitzaigun partida. Halere, asmatu genuen neurketari buelta ematen. Hori bai, oso parekatua izan zen».
Finaleko aurkaria laugarren geratu zen ligan, eta finala jokatzeko lehenengo sailkatuari irabazi zion finalerdia. «Denboraldi honetan ligan geratu garen lau lehenengo taldeen artean, batzuetan irabazten eta besteetan galtzen joan gara», esan du Gorostegik. «Larunbatean txapeldun izateko aukerak ditugu, hori seguru, baina egunaren arabera izango da emaitza. Beraiek ere irabazi izan digute denboraldian zehar, beraz, ez dago faborito argirik. Aste honetako entrenamenduak oinarritzen ari gara talde horren jokatzeko moduaren arabera, eta espero dugu irabaztea».
Datorren denboraldian maila bat gorago jokatzeko asmoa dute Toloboleikoek. Euskal Ligaren bigarren mailan ariko dira, eta babesle bila dabiltza liga horretan parte hartzeak eskatzen duen aurrekontuari aurre egiteko. «Harrobi sendoa du klubak eta gazte mailan dabiltzan neskek erreferente bat izan dezakete talde nagusia Euskal Ligan lehiatzen ari dela ikusita», esan du Gorostegik. Hain justu, infantil neskek bere mailako finala jokatuko dute Donostiako Pio Baroja kiroldegian, larunbatean.