Gipuzkoako saskibaloiaren hiriburu izango da Usabal

Finalen Finalak izena jarri diote Gipuzkoako saskibaloiaren sei final garrantzitsuenak bilduko dituen jardunaldiari. Larunbatean, hilaren 17an, izango da Usabal kiroldegian, Gipuzkoako Saskibaloi Federazioak antolatuta, TAKE klubaren eta Tolosako Udalaren laguntzarekin.

Andu Martinez de Rituerto Tolosako alkateak adierazi du «plazer handia» dela herriarentzat bigarren aldiz ekitaldia hartzea, eta eskerrak eman dizkie TAKE klubari eta Gipuzkoako Saskibaloi Federazioari hori posible egiteagatik. Era berean, final horiek eta parte hartuko duten taldeak balioan jarri ez ezik, denboraldi osoan zehar klub guztiek, kirolariek eta teknikariek entrenamendu eta partidetan egiten duten eguneroko lana ere nabarmendu nahi izan du.  

Jon Txakartegik, Gipuzkoako Saskibaloi Federazioko koordinatzaile nagusiak, ekitaldiaren garrantzia azpimarratu du: «Usabalen ospatzea, Gipuzkoako kirol-instalaziorik onenetakoa, benetako luxua da. Tolosako Udala eta TAKE klubaren inplikazio osoa eskertu nahi dugu hau guztia posible izan dadin». Txakartegik etxeko klubaren lana ere goraipatu du: «TAKEk urteak daramatza lan bikaina egiten, bere goi mailako taldeetan ere islatzen den harrobi sendo eta lehiakorra garatzen».

Ekitaldiari buruz, errendimenduko 6 finalak jokatuko dira larunbatean, kadete, junior eta senior goreneko mailak, gizonezkoenak zein emakumezkoenak, eta horietan Gipuzkoako txapeldunak erabakiko dira. Parte-hartzaileen aniztasuna nabarmendu du Txakartegik: «Sailkatutako 12 taldeetatik 11 klub desberdinetakoak dira, eta horrek erakusten du Gipuzkoa osoan lurralde ordezkaritza handia eta saskibaloiak maila ona duela».

Bere aldetik, Koldo Arsuaga TAKEko presidenteak klubak tokiko kirolarekin eta federazioarekin duen konpromisoa azpimarratu du: «Gure eguneroko jardueratik haratago, beti gaude prest honelako ekitaldietan batzeko eta laguntzeko. Denboraldi osoa daramagu federazioarekin eta udalarekin lanean saskibaloiaren amaiera handi hau arrakastatsua izan dadin, bai kantxaren barruan, bai kanpoan».

Hiru ordezkariek Gipuzkoa osoko eta Tolosako saskibaloi zale guztiak animatu dituzte larunbat honetan Usabalera joatera, «emozioz, ikuskizunez eta giro paregabeaz» beteriko jardunaldi batez gozatzera.

Finaletan parte hartuko duten klubak honako hauek izango dira: Zast Zarautz, Easo Basket, Iraurgi SB, Askatuak, Saski Axular, Ordizia, Ointxe!, Goierri K.E., CD Internacional, Donosti Dolphins eta Atletico San Sebastian.