Gipuzkoako Foru Aldundiko Lurralde Oreka Berdea departamentuak eta HAZIk Etorkizuna Bermatuz: belaunaldi arteko erreleboa nekazal sektorean prestakuntza programa berria jarri dute martxan. Programaren helburu nagusia da erretirorako adina gerturatzen ari zaien nekazariei prestakuntza integrala eskaintzea, etorkizuneko zalantzak argitzea eta prozesua erraztea. Alabaina, udazkenean hasiko den formakuntza ibilbidearen aurretik, hainbat bilera informatibo antolatu dituzte Gipuzkoako hainbat eskualdetan programaren nondik norakoak azaltzeko.
Hala, Tolosan bihar, hilaren 8an, 16:00etatik 18:00etara, kultur etxean egingo dute bilera informatiboa. Programaren xehetasunak azalduko dituzte, eta interesatuek prestakuntza ibilbideari buruzko informazio zehatza jaso ahalko dute. Bilera irekia izango da eta lehen sektorean diharduten guztiei zuzenduta dago. Bertaratzeko asmoa dutenek 943 11 21 73 telefono zenbakira deitu beharko dute, edo lurraldeoreka@gipuzkoa.eus helbidera idatzi.