Tolosako sanjoanak gero eta gertuago ditugu. Hori dela eta, datorren astelehenean, maiatzak 5, jaiak iragartzeko kartel lehiaketa martxan jarriko du udalak. Proposamenak hilaren 16ko 14:00ak arte bidali ahal izango dira. Udaletik aurreratu dutenez, diseinatzaile edota artista amateurrek nahiz profesionalek parte hartu ahal izango dute. Egile bakoitzak, gehienez, hiru lan aurkeztu ahal izango ditu udal webgunearen bitartez.
Proposamen guztietatik bakarra aukeratuko du epaimahaiak, eta egileak 500 euroko ordainsaria jasoko du. «Ezinbestekoa izango da lan originala izatea eta ez dira onartuko Adimen Artifiziala erabilita sortutako lanak, hau da, egilearen asmamenean oinarritutako kartelak onartuko dira soilik», adierazi du udalak.
Dagoeneko kontsultatu daitezke lehiaketaren oinarriak. Informazio gehiago behar izanez gero, interesdunak Kultura, Festak eta Gazteria sailarekin jarri beharko dira harremanetan, 943 670 383 zenbakira deituz –astelehenetik ostiralera, 10:00etatik 13:00era– edo festak@tolosa.eus helbide elektronikora idatziz.