Festa giroan agurtu dute Tolofolk jaialdiko bosgarren edizioa. Tolosako Berdura plazan izan da azken emanaldia, 19:00etan hasita, eta ordurako herritar ugarik bete dute plaza. Izan ere, gaurko protagonista Erramun Martikonera izan da, baina berarekin batera izan dira oholtza gainean Elene Arandia, Mixel Ducau, Garazi Esnaola eta Oreka TX.
Garikoitz Llobregat antolatzaileak azaldu duenez, «urtero gauza berezi bat prestatzen saiatzen gara Tolofolk jaialdirako. Erramunen izena buruan generaman eta eskualdeko artistekin josi nahi genuen nolabait. Azkenean, plater polita atera zaigu».
Euskal Herriko zein nazioarteko musikariek parte hartu ohi dute Tolofolk jaialdian, eta urtetik urtera ospe handiagoa hartzen ari dela esan du antolatzaileak: «Ikusi besterik ez dago lehen urtetik hona geroz eta jende leial gehiago dugula eta ez Tolosan bakarrik, eskualde zein Gipuzkoa mailan geroz eta jende gehiago animatzen da Tolofolk jaialdiaz gozatzera».
