Tolosako hiltegiko langileek elkarretaratzea egin dute, eguerdian, udaletxe aurrean. Hiltegiko langileekin batera, eskualdeko zenbait abeltzain eta harakin ere izan dira mobilizazioan.
Otsailaren 24az geroztik greba mugagabean daude langileak. ELA sindikatuak hiltegiaren kudeatzailea den Industrias Carnicas de Oria SA enpresa salatu du, «langileei azken hiru hilabeteetako soldatak ez ordaintzeagatik, eta enpresaren utzikeriaren erruz, hiltegiko etorkizuna kinka larrian dagoelako».
Langileak «haserre» daude, «ez enpresak ezta Tolosako Hiltegi Mankomunitateak ere, ez dutelako egoeraren ardura hartzen». Gainera, zerbitzuaren kudeaketaren eta langileen nominen ordainketaren ardura exijitu die mankomunitateari.
Halaber, ELAk «erantzukizunak» eskatu dizkio mankomunitateari. «Hiltegiko zerbitzua publikoa da, nahiz eta enpresa kudeatzailea pribatua izan. Hori dela eta, lizitazioa etetea eta behingoz zerbitzua publifikatzea eskatzen diogu», adierazi du sindikatuak. «Gaur gaurkoz, ez enpresak, ezta mankomunitateak ere, ez dute bere gain hartzen ardura. Ondorioz, langileak babesgabetasun egoeran daude», gaineratu du.
Bestetik, Tolosako hiltegiko langileek eskaera bat egin diote udalari: enpresa kudeatzaileak Donostia etorbideko 3. zenbakian dagoen lokala ustiatzeko alokairu-kontratua gainbegiratzea. Gaur, elkarretaratzea egiten ari ziren bitartean, Udaten erregistratu dute eskaera.
