Eugenio Ibarzabalek Jose Antonio Muñagorri Berastegin sortutako eskribauaren bizitzan oinarritutako eleberria idatzi du eta atzo aurkeztu zuten Tolosan. Andia elkarteak antolatuta Plaza Zaharrean Muñagorriren Bakea eta foruak aldarrikapenaren irakurketa eta errepresentazioa egin zuten aurrena eta ondoren aurkeztu zuten liburua udaletxeko batzar aretoan. Eguna borobiltzeko bertaratutakoentzat jan-edanak izan ziren Kabila elkartean.
Muñagorri, el conde y las condesas [Muñagorri, kondea eta kondesak] liburua Erein argitaletxean argitaratu du Ibarzabalek eta Berastegin jaiotako eskribauaren bizitzan oinarritutakoa da. Manuel Jose Zabala Villafuertesko kondearen artxiboa sakonki aztertu du horretarako eta, hortaz, bera, bere emaztea eta Etxauzko kondesa dira eleberri honen protagonistak, Muñagorrirekin batera.
Lehen Karlistadako protagonistetako bat izan zen Muñagorri, Berastegiko Elutsene etxean jaiotako eskribaua. Berekin batera eleberrian agertzen diren pertsonaien bizitzako gertaera tragikoei segika osatu du hari narratiboa Ibarzabalek eta XVIII. mendetik Lehen Karlistaldiaren bukaerarainoko Euskal Herriaren historia kontatzeko baliatu ditu idazleak gertakariok.
