Israel estatu terrorista! Palestina askatu! lelodun pankartaren atzean dozenaka herritar bildu dira Kontseilu Sozialistaren errebindikazioa babestuz. «Israelek Palestinarekin adostuta zuen su-etena hautsi eta ehunka hildako eragin dituenez, hori salatzeko elkarretaratzean bildu gara», adierazi dute Kontseilu Sozialistatik.
«Estatu sionistaren izaera genozida» salatu dute Trianguloan egindako elkarretaratzearen bitartez. Era berean, azken gertakariak salatu nahi izan dituzte: «Gazako zerrendan egin ditu aireko erasoak, eta hildakoak eragiteaz gain, gutxienez 500 palestinar zauritu ditu. Bonbardaketek Gaza, Khan Younis eta Rafah bezalako zonalde jendetsuei eragin diete, bi hilabeteko su-etena hautsiz. Lekukoek eta Al Jazeera hedabideak jakinarazi dutenez, erasoaldiak palestinarren etxebizitzak, ospitaleak eta babeslekuak kolpatu ditu Gazako zerrendan. Sionisten armadak operazioa justifikatu du argudiatuta `Hamasi presoak askatzeko presioa egitea´ bilatzen duela, baina erresistentzia palestinarrak ez du su-etenaren amaiera ofizialki iragarri oraingoz».
Elkarretaratzearen aurretik, performancea
Kontseilu Sozialistak Tolosan, atzo, osteguna, beste ekintza bat burutu zuen Palestinari elkartasuna adieraziz, eta Gazan bizi diren egoera salatuz. Performanceak egin zituzten Euskal Herria plaza sarreran eta baita Fronton taberna parean ere.
