Mugimendu Feministaren esanetan, martxoaren 8a ospakizunerako bakarrik nahiko lukete, «baina, urtez urte gehiago dira kalera ateratzeko ditugun arrazoiak». Zaintza sistema askorik ez dela aldatu salatu dute, eta azaroaren 25eko mezua gogoratu nahi izan dute: «Bai, gizonez ari gara. konponbidea ez bazara, arazoa zara!».
Borroka feministak lorpenak izan baldin baditu ere, oraindik asko dagoela egiteko azpimarratu dute: «Indarkeria matxistak, erasoek eta menderakuntzek desagertu egin behar dute; krisi ekosoziala ere mahai gainean jarri nahi dugu, eta badagokigu horren ardurak exijitzea eta hori salatzea». Azkenik, Mugimendu Feministatik migrazio politikak gaitzetsi dituzte, inor ilegala ez dela gogoratuz.