Urtarrilean Amaiur haur parkeko zorua konpontzeko lanak abiatu zituen herri lanetako udal brigadak. Inauterien aurretik, Foru etorbidearen alboko egurrezko egitura desegin zuten eta, horren ordez, hormigoizko beste bat eraiki, azpian zaborra ez pilatzeko eta irrist egiteko arriskua gutxitzeko. Mantenu-lanak, jaiak pasa ondorenerako utzi zituzten.
Bada, pasa den ostiralean egin zituzten lan horiek. Zabu irisgarri bat jarri zuten hondatutako baten ordez; gisa honetako lehena da Tolosan. Urritasun funtzionalen bat duten haurrek parkean jolastu ahal izatea da helburua. Horrez gain, moketan zeuden zulo batzuk estali eta parkeko beste zenbait elementu konpondu zituzten brigadako langileek.