Karroza batek eta hainbat konpartsek udalaren mezua jaso dute gaur, ateratzeko baimenik ez zutela jakinaraziz. Udalaren esanetan, inauterien aurretik egindako bileretan adostutako arauak ez dituzte bete eta horregatik hartu dute erabakia, gaur, Kultura eta Gazteria sailek, Udaltzaingoak eta alkatetzak osatzen duten koordinazio mahaian.
Konpartsei buruz udalak esan du aurreko egunetan behin baino gehiagotan ohartarazi zietela musika altuegi zutela, baina ez zutela kasurik egin. Karrozari lotuta ere gauza bera esan du; Zaldunitan musikaren bolumena neurtu zutela eta muga pasa zutela. Bolumena jaisteko eskatu zieten, baina ez zutenez kasurik egin, gaur ateratzeko debekua jarri diete. Udalak nabarmendu du, aurrez araudi bat landu dela eta bilera bat baino gehiago egin dela arauen berri emateko.
Konpartsetako kideek 'Ataria'-ri esan diotenez ez da egia musikaren bolumenaren muga pasa zutela, izan ere, bozgorailuak jada, baimendutako dezibelioen arabera mugatuak dituzte. Kide horien ustez, guzti honen atzean helburu garbia dago: «konpartsa txikiak inauterietatik kanporatzea».