San Frantzisko pasealekuaren ingurua karroza handiez gainera, kuadrilla eta norbanakoz bete da Asteartita goizez.
Mozorroak eta esketxak nonahi ikus zitezkeen. Besteak beste, Ataria-ko kamera aurrean garai bateko argazkilariak kokatu dira, ezkontza bateko gonbidatuak, dantzariak, aiton amonduak ilobak zaintzen eta trikotatzen, lekaimeak arrautzak jasotzen eta jana eta edariak banatzen, kedar-garbitzaileak, bururik gabekoak, Mona Lisa Louvretik alde eginda, blues musikariak, Eliza santuaren egutegiak, Amazoneko banatzaileak atsedena hartzen... Guztia da posible Tolosako kaleetan Asteartita egunez.