Atzera kontaketa bukatu eta hasi dira Tolosako inauteriak. Beste urte batez inauterizalez eta kolorez gainezka zegoen Plaza Zaharra lehertu du udaletxeko etxafuegoak, eta datozen egunetan gertatzen denarekin izango da zer kontatua.
Urtero legez Kabi Alai elkarteko konpartsak antolatu du inauterien hasierako antzezpena eta, oraingoan, kultur ikuskizunak finantzatzeko udal dirulaguntza —eza— izan dute zirika gai. Nazioarteko artisten plazatzat aldarrikatu dute Berazubi auzoa eta bi auzotarrek aurreratu dute jaso dituztela zenbait abeslariren eskaerak ere, horien artean, C. Tangana, Pimpinela, King Afrika eta Leticia Sabater.
Izan da, ordea, nobedaderik ere, hain zuzen, pregoia lehenengoz bota duela Itxaso Urdanpilleta inauterietako udalbatzako alkate berriak.