Tolosako hiltegia kudeatzen duen Industrias Cárnicas del Oria enpresako langileek greba mugagabearekin aurrera jarraitzea erabaki dutela azaldu du ELA sindikatuak. Tolosako Hiltegi Mankomunitateak hiltegiaren kudeaketa bere gain hartu izana positibotzat jo du sindikatuak, baina ez du berme nahikorik ikusten zor diren nominak ordaintzeko. Gauzak horrela, greba mugagabeak eta mobilizazioek jarraituko dutela ohartarazi dute.
Hiru eguneko grebaren ondoren, Tolosako Hiltegi Mankomunitateak gatazkan esku hartu du, behin-behineko kontu-hartzaile bat izendatuz. «Esku-hartzeak bere lege prozedura» duela, adierazi du mankomunitateak, eta gaur gaurkoz, ezin duela zehaztu soldatak noiz ordainduko diren. Nolanahi ere, «konpromiso osoa» berretsi du horretarako eta horrela jakinarazi die langileei atzo egin zuten batzarrean. Hiltegiak lansariak ordaintzeko likidezia ez badu, udalek jarriko dute dirua.