Inauterietan bere presentzia izaten du Beotibar frontoiak, eta aurten ere pilota jaialdiak izango dira. Larunbatean, Zaldunita Bezperan, emakumezkoen Ados Pilotaren Binakako Txapelketaren jardunaldia izango da jokoan, 11:30ean hasita. Promozio mailako Iriarte-Sotil eta Lamadrid-Perez bikoteak ariko dira lehian lehen partidan, eta lehen mailako Iturriaga-Mendiburu eta Aranburu-Mujika bigarrengoan. Sarrerak 5 euro balioko du.
Astelenitan zein Asteartitan gizonezkoen jaialdiak izango dira, ohiko moduan, Beotibarren, eta bi egunetan 16:30ean hasiko da. Ez dira Binakako Pilota Txapelketako partidarik izango bertan. Astelenitako jaialdian, lehenengo partidan Agirre-Ugartemendia eta De la Fuente-Aldabe ariko dira nor baino nor, eta bigarren partidan Urrutikoetxa-Aranguren eta Zabala-Gabirondo. Asteartitako jardunaldian Dario-Erostarbe eta Larrazabal-Lizeaga bikoteek jokatuko dute lehenengo partida, eta bigarrengoan Altuna III-Eskuza eta Jaka-Martija ariko dira elkarren aurka. Bi egunetan sarrerak 25 euro balioko ditu.