Iazko ekainean hil zen Antxon Elosegi Vitoria tolosarra. Ekarpen handia egin zion Tolosari, batez ere kulturalki. Tolosako Ekinbide Etxeko lehendakaria izan zen, eta 2023an, Kabi Alai Kuttun izendatu zuten; urte horretan, berak eman zien hasiera inauteriei.
Bada, aurtengo inauterietan, Kabila Elkarteak hainbat ekintza antolatu ditu Elosegi omentzeko. Horietako bat, I. Antxon Maderas Saria izango da. Lehiaketa bat sortu du elkarteak, Asteartita goizean egiten den Pattar zezeneko errekortari onena izendatzeko. Irabazleak 200 euroko saria jasoko du, inauterien ondoren Kabila elkartean egingo duten ekitaldi batean.
Kabila elkartetik adierazi dutenez, «tonu barregarri, etxeko eta ez-ofizial batean» antolatu dute lehiaketa. Hiru baldintza ezarri dituzte: «Batetik, lehiaketako parte-hartzaileek Tolosako Inauterietako zezenketetan parte hartzeko Eusko Jaurlaritzak ezarrita dituen gutxieneko baldintzak bete beharko dituzte. Bestetik, errekorte deritzo ganaduari aurrez aurre deitu, bere bidera irten, erasoan errekortea egin eta, aurpegia irabazita, bizkarrez ateratzeari, baita salto edo iskin egiteari ere. Azkenik, Kabila Elkarteak izendatuko ditu epaileak eta haiek erabakiko dute zein izan den errekortari onena. Haien erabakia apelaezina izango da».