Tolosaldeko Kontseilu Sozialistak Pobretzearen aurrean elkartasuna saretzen lelopean, beharra duten familiei eta norbanakoei laguntzeko ekimena du martxan: Elkartasun biltegia. Hain justu, abenduan hasi ziren ekimenarekin, eta azaldu dutenez, pasa den astean eskualdeko hainbat supermerkatutan (Tolosako bi Eroskitan eta Ibarrako Coviranen) oinarrizko produktuak biltzen aritu ziren.
Bihar, hilaren 21ean, jarraipena emango diote biltegiari. Amarotz eta Izaskun auzoetan postu bana jarriko dute, eta neguko arropa eta oinetakoak nahiz mantak jasoko dituzte. Horrez gain, Tolosako inauteriei begira, mozorroak eta txilabak ere jaso asmo dute.
Amarotz auzoaren kasuan, auzoko estalpean jarriko dute postua, eta Izaskun auzoan, Sputniketako futbol zelaian. 17:00etatik 20:00etara izango dira bi auzoetan. Kontseilu Sozialistatik esan dutenez, martxan duten proiektuaren bitartez, «geroz eta orokortuagoa den pobretzearen aurrean», elkartasuna saretzearen beharra nabarmendu nahi dute. Biharko bilketan jasotakoa bharrean dauden familien eta norbanakoen artean banatuko dutela adierazi dute Kontseilu Sozialistatik.