Goizean aurkeztu dituzte urtean zehar uretaratuko diren TAKeko arraunlariak eta batelak. Denboraldia hasi berri den honetako balorazio «positiboa» egin du Manex Balerdi entrenatzaileak. «Taldeak aurten oso ondo ikusten ditut eta momentuz ondo gabiltza, oso goran, gure helburua hori baita; estropada txukunak egitea, lehen postuetan sailkatu ahal izateko», esan du.
Ohi moduan, aurkezpen estropadak egin dituzte Oria ibaian, eta ondoren, talde argazkiak egin dituzte Zerkausia gaineko terrazan, entrenatzaileekin batera. Infantil, kadete eta jubenil taldeak aukeztu dituzte, hain zuzen. Guztira, zortzi talde –infantil mailako hiru, kadete mailako lau eta jubenil mailako bat– eta 60 arraunlari –8 mutil eta 52 neska– izango dira aurtengo denboraldian.
Gizonezkoen parte hartze «eskasa» nabarmendu du entrenatzaileak, eta parte hartzeko deia egin nahi izan die: «Edozein zalantzaren aurrean gurekin kontaktuan jar daitezela». Aurkezpen ekitaldia amaituta, Mele melen egin dute bazkaria.