Gipuzkoako Garraioaren Lurralde Agintaritzak astelehenean iragarri zuen bezala, 12 urtetik beherako haurrek garraio publikoa doan dute gaurtik aurrera. MUGI sisteman sartuta dauden garraio publikoko operadore guztietarako izango da doakotasuna, eta horien artean da Tolosako Hiribusa.
Horretarako, beharrezkoa izango da Mugi txartel pertsonalizatua gidariari erakustea. Doako txartel bat emango diote erabiltzaileari. Adinarekin zalantzak izanez gero, identifikaziorako beste agiri edo txartel bat eskatu ahal izango du gidariak, 12 urtez azpikoa dela ziurtatzeko.
Prozedura hau behin-behinekoa izango da, balioztatze makinen sistemetan egokitzapenak egiten dituzten bitartean. Behin hori eginda, Mugi txartela izatea derrigorrezkoa izango da doan bidaiatu ahal izateko, eta 12 urtez azpikoek beren txartela balioztatu beharko dute.