Pasa den astean abiatu zituen Gipuzkoako Ur Kontsortzioak Igerondo kalea eta Jon Andoni Irazusta bialaren arteko eremuan ur saneamendua hobetzeko lanak, euri urak eta fekalak bereizteko helburuarekin.
Lanekin aurrera egiteko, errepidearen tarte batean jardun behar dute, eta horretarako guztiz eten behar da trafikoa, bi noranzkoetan. Ibilgailu gehien pasatzen diren puntuetako bat izanik, eta iparraldera joateko beste biderik ez dagoela ikusita, lanak egunez egin ordez, gaueko ordutegian egingo dituzte. Bihar gauean ariko dira lanean, eta egun bakarreko lana izango dela azaldu du Ur Kontsortzioak.
Hala, trafikoa guztiz itxiko da 22:00etatik 05:00etara bitartean. Santa Klara kalean eta Arrameleko zubian moztuko da errepidea. Klinikara edo garajeetara joan ahal izateko tartea utziko da, Santa Klaratik barrena. Hala ere, Klinikara igotzeko, tarte horretan, eta aukera balego, Santa Lutzia aldeko errepidea lehenesteko dei egiten da.
Ur garbiak eta zikinak bereiztea da lanen helburu nagusia. Hoditeria berria egingo dute, eta ur garbiak zuzenean Oria ibaira isuriko dira; ur zikinak, aldiz, Jon Andoni Irazusta bialeko hoditeria nagusiarekin batuko dira.