Larunbatean XXIV. Paco Sanchez Saria izan zen jokoan Usabal igerilekuan, Tolosaldea IKT taldea antolatuta. Guztira bost taldetako 140 igerilari inguru izan ziren parte hartzen bertan, horietatik 65 Tolosaldea IKTkoak. Guztira 32 domina lortu zituzten eskualdeko igeri taldeko kideek. Horrez gain, Tolosaldea IKTk Paco Sanchez Sariaren kopa eraman zuen, erreleboka jokatzen dena. Bertan bost taldeetako 12 igerilarik parte hartu zuten, sei neska eta sei mutil, hainbat adinetakoak, eta bakoitzak 50 metro egin behar izan zuen igeri.
Parte hartu zuten beste taldeak Zarautz, Buruntzalddea, Taso (Zumaia) eta Amaya (Iruñea) izan ziren. Alebinek (2012-2013) eta benjaminek (2014-2015-2016) parte hartu zuten. Alebinek bi proba egin ahal zituzten, eta benjaminek proba bakarra, eta adinaren arabera distantzia aldatu egiten zen.
Tolosaldea IKTko Beñat Bidaola entrenatzaileak azaldu du «oso gustura» daudela igerilariek egindakoarekin: «Teknikoki asko hobetu dute irailetik. Adin horietan denborei ez diegu garrantzirik ematen, baizik eta nola hobetzen ari diren bere igeriketa».
Eguberrietako Nazioarteko Saria
Tolosaldea IKTkoen hurrengo hitzordua abenduaren 27an egingo den Eguberrietako Nazioarteko Saria izango da. Bertan maila handiko igerilariek parte hartzen dute. Donostian egingo da lehiaketa, 50 metroko igerilekuan. Talde moduan Euskal Herriko Selekzioak parte hartzen du, eta bertako kide bezala ariko da Unai Zubeldia Tolosaldea IKTko igerilari tolosarra.