Binakako Txapelketako bigarren jardunaldiko partida jokatzekoak ziren gaur, Tolosako Beotibar frontoian, Peña II-Albisu eta Larrazabal-Mariezkurrena II bikoteak, baina hezetasunak eragindako arazoak direla eta, bertan behera uztea erabaki dute Esku Pilotako Enpresen Ligako arduradunek. Hiru partida zeuden aurreikusita gaurko jaialdian: lehenengoan, B Serie Txapelketakoan, Bakaikoa-Salaverri II eta Senar-Eskiroz bikoteek neurtu behar zituzten indarrak; hirugarrenean, berriz, Mata eta Erostarbe, Murua eta Aldaberen aurka aritu behar ziren.
Zorua eta ezker horma oso labainkor zeudela eta, Esku Pilotako Enpresen Ligak hartu du erabakia. EPELeko arduradunek zenbait neurri hartu dituzte egun osoan zehar, hezetasuna murriztu eta partidak jokatzea ahalbidetzeko, baina ez dira nahikoa izan. «14:00etan etorri naiz, eta zorua ez zegoen horren gaizki, baina okertzen joan da. Batez ere, aurreko koadroetan oso labainkor dago. Guzti horri, ikusleek eragiten duten berotasuna gehitu behar zaio; hezetasuna handitzea ekarriko luke horrek», azaldu du Jon Apezetxeak Aspeko ordezkariak.
Pilotan aritzeko Beotibarrek gaur zuen egoera «txarra» zela esan du Apezetxeak. Nagusiki, hezetasunak eragindako edozein lesio ekidin ahal izateko hartu dute erabakia. «Hori da lehentasun handiena duena. Kirolariengan pentsatu behar dugu, min hartzeko aukera handia zelako».
Sarrerak itzultzeko aukera
Gaurko iragarritako jaialdia hilaren 9an, astelehena, jokatuko da Beotibarren, 16:30ean hasita. Sarrera erosita zutenek orduan erabiltzeko aukera izango dute. Bertaratu ezin dutenei edo nahi ez dutenei dirua itzultzeko aukera egongo da. Horretarako, sarreraren jabeek sarrerak@entradasfronton.com helbide elektronikora mezua idatzi edo astelehenean bertan Beotibarko leihatilara gerturatu beharko dute. «Hartu beharreko erabakiak dira, nahiz eta ez izan inoren gustukoak», adierazi du Apezetxeak.