Ostegunean, hilak 5, piztuko dituzte Gabonetako argiak Tolosan. 19:00etan izango da pizte ekitaldia, Plaza Berrian, eta Eduardo Mocoroa Udal Musika Eskolako akordeoi, biolin eta txistulari taldeek girotuko dute. Aurten, ikasleak izango dira argiak piztearen arduradun.
Behin argiak piztuta, argiztatutako panpinen photocall bat jarriko dute kioskoaren aurrean, nahi duen orok argazkiak atera ditzan. Euria egingo balu, photocall-a kioskoan bertan jarriko dute.
Aurtengo Gabonetako argietan erabiliko diren argiak kontsumo baxuko Led argiak dira eta 22:00ak arte izango dira piztuta.
Gabonetako eskaintza
Eguberrietako aisialdi eskaintza ere prestatu dute udalak eta eragile ugarik. Ostegun eguerdian emango dute ekitaldi sorta guztiaren berri, baita aurtengo nobedadeen berri ere.