Ekainean, Txotxongilo Antzerkiko Ekimenaren Nazioarteko Sariaren irabazle izendatu zuten Tolosako Topic museoa. Aviama Txotxongiloen Hiri Lagunen Elkarteak antolatzen du sariketa, 2021az geroztik, eta adierazi dutenez, aurten, «ekintza berritzaileen bidez, txotxongiloen artea nabarmentzen, haien garapena defendatzen eta publiko zabalaren aitortza sustatzen laguntzeagatik, nazioarte mailan saritu nahi izan ditugu».
Ekainean saridun izendatu bazuten ere, 42. Titirijai Jaialdian jaso du saria Topic-ek, antolatzaileen eskutik. Pasa den larunbatean, jaialdiaren inaugurazio ekitaldian egin zuten sari banaketa, eta bertan izan ziren Kepa Goikoetxea Tolosako Ekinbide Etxeko lehendakaria, Estitxu Zaldua eta Juanjo Herrero jaialdiko zuzendariak, Urkiri Salaberria Eusko Jaurlaritzako Kultura eta Ondare zuzendaria, Isaac Palencia Gipuzkoako Foru Aldundiko Kultura Sustapenerako eta Gazteriako zuzendaria eta Goiuri Eceiza Tolosako Udaleko kultura zinegotzia. Lucile Bodson Aviamako koordinatzaileak banatu zuen saria.