Bat-batean datozen kantuak, kolpetik konposatzen diren horiek biltzen ditu Postal Kolekzionistak talde tolosarrak aurkeztutako lan berriak: Ezusteko Kantak: errinozerontea. Bildumaren lehenengo zatiak urtea beteko duenean iritsi dira kantu berriak, denen artean zazpi kantuko bilduma osatuz.
Errinozeroa «indar ikonikoa» duen animalia dela nabarmendu du Iñigo Asensio taldeko kide eta sortzaileak. «Bahman Gobhadi zinema zuzendari iraniarraren «kolpatu gaitu errinozeronteak» metafora bisuala baliatu nuen diskoaren esaldi bat osatzerakoan, eta sentitu nuen esaldi hark laburbiltzen zuela nolabait Ezusteko Kantak kontzeptua. Diskoa bada kolpatu gaituzten errinozeroek sortutako lana, neurri batean», azaldu du.
Sortzaileak iradokitzen du Ezusteko Kantak gehiago izango direla bilduma honi jarraipena emanez. «Kantak berak ezustean harrapatzen du musikaria, eta kanta horietako batzuk osatzen dute lan berria», esan du Asensiok. Ez dira bakarrik aritu zazpi kantu hauetan eta lehen bilduman Mugan taldeko Pablo zein Anerekin elkarlanean aritu ostean, Sara Azurzaren kolaborazioa izan dute lan berriko Errinozerontea kantuan.
Ohiko plataformetan dago entzungai taldearen hirugarren lana, eta lehendabizikoz, Durangoko Azokan egongo da bilduma formatu fisikoan lortzeko aukera. Abenduaren 5ean, Ahotsenean aurkeztuko dute, 18:00etan.
