Donostiako hipodromoan nazioarteko Lasarteko krosa egin zen igandean, eta Tolosa CF Atletismoko atletak bertan izan ziren maila ezberdinetan lehiatzeko. Hamasei urtez azpikoen mailan, gizonezko eta emakumezkoen taldekako sailkapenean bigarren postua eskuratu zuten Tolosarrek.
Hemezortzi urtez azpikoen mailari dagokionez, Idoia Arrospidek garaipena eskuratzea lortu zuen emakumezkoetan, eta Manex Civico ere lehen postuan helmugaratu zen hogei urtez azpikoen gizonezkoen proban. Naroa Rojo ere garaipenetik hurbil izan zen nesken mailan, eta amaieran, meritu handiko hirugarren postuarekin konformatu behar izan zuen.
Azkenik, eguna borobiltzeko, gizonezko absolutuen taldeak ere hirugarren postua lortu zuen taldekako sailkapenean. Lasterketa irabazteko leian ibiltzea lortu ez bazuten ere, Ander Ortiz 20.postuan helmugaratu zen Donostiako hipodromoan.