Emakumeen bizitzak biolentziaz zeharkatuta daudela nabarmendu du asanbladak: «hitzezko biolentziaz, biolentzia sinbolikoaz, biolentzia ekonomikoaz, sexu biolentziaz, era guztietako jazarpenaz. Emakumeok edozein egoera eta gunetan dugu erasoren bat jasateko arriskua, eta errealitate horrek eskatzen du gaiari behingoz errotik heltzea».
Esan du afera hau ez dela erasotuaren eta erasotzailearen arteko kontu partikularra eta azken asteotan Tolosan jazotakoak ez direla gertakari isolatu eta bakanak. «Salaketa baten ondorengo adierazpenek edo ekintzek ezin dute izan konponbide bakar, egiturazko gaitz honentzat. Indarkeria-giro hau, bortxaketaren kultura hau, biolentzia hau, sistemikoak dira, eta ardura jendarteko norbanako eta eragile guztiona da: non geunden gu hau guztia gertatzen ari zen bitartean? Hau denon kontua da, eta lokatzetan denok sartuta bakarrik aldatuko dugu zerbait». Babes eta sinesgarritasun osoa adierazi diete jazarriak izan diren emakumeei eta mezu garbia helarazi: «ez zaudete bakarrik».