Euskararen aurkako oldarraldia salatu du Euskalgintzaren Kontseiluak eta Galtzaundi euskara taldeak: «Kasu honetan, gainera, adineko egoitzei eragiten die epaiak, gure herrietako sektore zaurgarrienetako baten eskubideak urratuz. Jasotako sententziak, Kabia erakundearen baitako egoitzetan euskaraz artatuak izateko bermea ezabatzen digu herritarroi».
Honela, euskalgintzak gogoratu du «herritarrokin zuzeneko harremana izango duten lanpostuetan euskararen ezagutza eskatzeak, herritar guztion eskubide linguistikoak bermatzea ziurtatzen» duela.
Azken sententzia hau herritarren hizkuntza eskubideen aurkakoa izanik, helburu argia duela salatu dute: «Euskararen erabilera oztopatu eta gaztelania inposatzea».
Honela, eskualdeko herritarren hizkuntza eskubideen alde egiteko, Galtzaundi euskara taldeak dei egiten die herritarrei urriaren 28an, 19:00etan, Tolosako epaitegiaren aurrean egingo den elkarretaratzean parte hartzera.