Tolosa CF gimnastika erritmikoko taldea bere 25. urteurrena ospatzen ari da aurten eta bere torneoa horren isla izango da. Hain justu, 25. Tolosa CMO Torneoa egingo da bihar egun osoan zehar Uzturpe frontoian. Goizeko saioa 10:45etik 14:00etara izango da, eta oinarrizko taldeek parte hartuko dute, infantil, kadete eta jubenil mailetan. Arratsaldeko saioa 16:30etik 19:30era izango da, eta absolutu mailako infantil, junior, senior eta lehenengo mailako taldeek parte hartuko dute. Sarrera doan izango da.
Euskal Herriko taldeez gain, Errioxa, Gaztela eta Leon, Kanariar Uharteak eta Kantabriakoak izango dira parte hartzen. «Topaketa estatu mailako txapelketan parte hartzen duten taldeentzat da», azaldu dute antolatzaileek. Tolosa CF-ko lau taldek parte hartuko dute: goizean bi kadete taldek, Tolosa P eta Tolosa H, eta jubenil talde batek, eta arratsaldean senior talde mistoak. Guztira 68 ariketa izango dira ikusgai.
Tolosa CF-tik beraien babesleei eskertu diete, CMO Valves, Garaje Tolosa eta Udarko Promo etxeei: «Hauen laguntza ezinbestekoa 25.urteurrena ospatzeko aukera izateko. Ilusio eta gogo handiz gaude etxean gure lana erakutsi eta kanpotik datozenei etxean bezala sentiarazteko».
