Tolosako Mirua musika taldeak bere disko berriko lehen single-a aurkeztu du gaur: Mugaz gaindi. Bideokliparekin batera aurkeztu dute kantua. Taldeak adierazi duenez, «aro berri bati» ekingo diote disko berriarekin: «Lan berria ahotsik gabe entzunez gero, ez zenuten esango Mirua denik», esan du goizean Mattin Zeberiok Gaztea irratiko Dida saioan.
Folkloreak izango du bere lekua Miruaren lan berrian. Horren erakusle, Malentxo eta Mattin Zeberio eta Maitane Iruin taldeko kideez gain, herriko erraldoiak eta Oier Gastesi bordon dantzaria dira bideoklipeko protagonistak, baita bonboak ere.
Zuzeneko emanaldiei dagokienez, Miruak bi kontzertu eskainiko ditu disko berria aurkezten hasi aurretik: Donostiako Kutixiak jaialdian eta Gazte Topagune Sozialistan.