Boluntariotzari balioa eman eta elkarlana sustatzeko eguna izan dute gaur Tolosan. Izan ere, Tolosako Udalak eta Tolosako Inmakulada Lanbide Ikastolak elkarlanean antolatutako Tolosako Elkarteen eta Boluntarioen Azoka egin dute goizean Zerkausian. Azokaren helburu nagusia Tolosako elkarteen aniztasuna eta boluntarioen lana ikustaraztea izan da, eta era berean, boluntariotza sustatzea, herritarrak gizartearekin inplikatzeko eta herriko eraldaketan parte hartzeko aukera emanez.
Helburu horiekin bat egin dute aurtengo azokan parte hartu duten Tolosako 28 elkartek. Horien artean izan dira, Ereite Elkarte Multikulturala, Boolo Senegal, Peñaskal Kooperatiba, Minbiziaren Aurkako Elkartea, ADAHIgi, Topic, Cuerpo Europeo de Solidaridad, Bizilagunak, Asebier, Ortzadar Elkartea, Afagi, Agi, Urratsbat, Aspace, Acabe, Grupo Social Once, Jatorkin Al-Nahda, Nagusilan, Zutani, Adinkide, Adelprise, Gautena, ACCU Gipuzkoa, Atzegi, Gizalde, Garagune eta Itaka Eskolapioak Fundazioa.
Lehenik, Orixe, Herrikide, Laskorain eta eskualdeko zenbait ikastetxetako ikasleen bisitak jaso dituzte. Ikasleak azokaren bueltan aritu dira, postuz postu, elkarte bakoitzaren lana ezagutzen. Gainera, boluntariotza horretan parte hartzeko aukera ere izan dute, eta ikasle asko izan dira elkarlan horretan inplikatu direnak. Ondoren, Tolosako Inmakulada Lanbide Ikastola eta Gainberri ikastetxeetako ikasleen txanda izan da. Herritarrek ere azokara hurbiltzeko aukera izan dute.
Horrez gain, Gizalde Gipuzkoako Boluntariotzaren eskutik, mahai ingurua egin dute elkartegintza eta boluntariotzaren gaur egungo egoeraren inguruan hausnartzeko. Hitzaldiaren ostean, solasaldia egin dute elkarteetako ordezkari, ikasle eta udal ordezkari politiko-teknikoen parte hartzearekin batera.