Tolosako kiroldegian gizon batek emakume bati eraso egin diola salatu du Tolosaldeko Itaiak. Horrekin batera, gaia lantzeko asanblada ireki bat egingo dutela ere iragarri dute, hain zuzen, etzi –ostegunean–, 18:30ean, Tolosako kultur etxean. Bertaratzera gonbidatu dituzte herritar guztiak, «argi» gera dadin «horrelako» gertaerak gaitzetsi eta salatuko dituztela.
Azken eraso hori salatzeaz bat, Itaiak gogora ekarri ditu urtean zehar jazotako beste hainbat, horien artean, osteopataren kasuak, inauterietakoak eta azken asteetakoak. Eta, harago, uste dute erasoak «normalizatzen» ari direla: «Gaur egun ideia erreakzionarioek eta horien ondorio den matxismoaren ukapenak agerian uzten du erasoen normalizazioa eta erasotzaileen inpunitatea».