Tolosako merkatarien elkarteak azaldu duenez, eramateko kafeen kontsumoak gora egin du azken urteotan, eta, honekin batera, erabili-eta-botatzeko edalontzien erabilerak. Hala, edalontzi horiek egunerokotasunean sortzen duten hondakin bolumena oso handia dela diote merkatariek, eta horregatik, ingurumenarekiko erantzukizuna eta kontzientziazioa sustatu nahian, Katilu edalontzi berrerabilgarriak sortu dituzte. «Aukera iraunkor eta erosoa da, erabiltzaileek behin eta berriro erabiltzeko diseinatutakoa», esan dute Tolosa&Co-ren arduradunek.
Katilu merkatarien elkarteko hainbat kafetegitan dago eskuragarri. Bi euro aurreratuta eskuratu daiteke, eta erabiltzaileek edaria bukatu ostean, edalontzia ekimenera harpidetutako kafetegietan itzuli eta berri bat jasoko dute eskaera berriarekin batera. Gainera, noiznahi eskatu daiteke aurreratutako 2 euroak itzultzea.
Katilurekin erabilera bakarreko edalontzien kopurua murriztu nahi dute, ingurumenarekiko konpromisoa sendotuz, lehen urratsa Tolosako kafetegi saretik eginda. Esan dute erabiltzaileek aukera paregabea izango dutela beren egunerokotasunean sortzen duten hondakin kopurua murrizteko.
Katilu ondorengo establezimendutan eskuratu daiteke: Iparra Beer, Larramendi Okindegia, Mujika, Rondilla kaleko eta San Frantzisko pasealekuko Eceiza gozotegiak, Gozona, San Frantzisko 25 Cafe eta San Frantzisko pasealekuko Erreberrin.