Azken txanpara iritsi dira Berazubiko auzotarrak. Izan ere, gaur agurtuko dituzte auzoko festak, baina iluntzera arte izango dute zertaz gozatu. Goizean, esaterako, emakumezkoen toka txapelketa egin dute, eta horren ostean, Tolosako Udal Musika Bandaren kontzertuaz gozatzeko aukera izan dute. Bandaren doinuak auzoan nagusitu dira, eta herritarrek plaza bete dute. Ondoren, bazkaria egin dute.
Arratsaldean ere hainbat ekintzaz gozatzeko aukera izango da. DJ Meyd eta Udaberri dantza taldea izango dira auzoa girotzen. Ondoren, kalejira egingo dute auzo elkartetik arratoiarekin, eta horren erretzearekin agurtuko dituzte aurtengo festak. Hain zuzen, 21:30etan izango da festa amaierako txupinazoa.
