Sormenetik ekimenaren aurtengo bigarren saioa arkeologiari eskainia izan da. Horretarako, Galtzaundi Euskara Taldeak gaia lantzen ari direnen profesionalen lekukotzak eraman ditu Zerkausiaren azpialdera. Hain justu, Juantxo Agirre, Leire Malkorra eta Mattin Aiestaran arkeologoak izan dira Tolosan. Arkeologia eta euskararen inguruan aritu dira, eta beraiei galderak egiteko ardura Fernando Rojok izan du.
Zer da Sormenetik
Tolosako kale erabilera neurketek adierazten dutenez, euskara indartsuen larunbateroko azokaren bueltan dago eta Sormenetik ekimenaren bitartez euskara indartsuen dagoen guneari hauspo berria eman nahi izan zaio. Horrez gain, kultur espresio ezberdinak gune berean batu asmo dira, kultur hausnarketarako eta heziketarako gune bilakatu eta herritarrak eta kultur espresioak ezagutzera emateko. Hori dela eta, euskara, sorkuntza eta azoka elkarren artean aberasteko, edizio berri honetan ere publikoak euskal sortzaileen ikuspegia zuzenean jasotzeko aukera izan du.