Sexu-askatasunaren aurkako delituengatik 18 urteko gizonezko bat atxilotu du Ertzaintzak Tolosan. Tolosako Udalak udalbatza osatzen duten alderdien adostasunarekin, sexu-erasoak gaitzetsi ditu. Hain justu, gaur eguerdian kasuaren berri izan bezain pronto, sexu-erasoen aurkako protokoloa aktibatu eta Larrialdietako Mahaiaren bilera deitu dute.
Udalak erasoak jasan dituzten emakumeei elkartasuna adierazi nahi die, eta beren eskura jarriko ditu baliabide guztiak, hala nahiko balute: doako laguntza psikologiko eta juridikoa eskainiko die Gizarte Zerbitzuen eta Andragora Tolosaldeko Emakumeen Etxearen bitartez.
Era berean, gisa honetako jarrerak salatu ditu udalbatzak: «ez dute lekurik gure gizartean». Horrekin batera, Tolosako Mugimendu Feministak biharko deitu duen elkarretaratzearekin bat egin du udalak, eta herritarrei dei egin die parte hartzeko.