Bueltan da Mugi Tolosa, bakardadeari eta sedentarismoari aurre egin eta adinekoen artean ohitura osasuntsuak sustatzea helburu duen egitasmoa. Bihar hasiko dira irteerak. Ekaineko lehen astera bitarte, asteazkenero egingo dituzte ibilaldiak Tolosan zehar, nahiz eta tartean badiren salbuespen batzuk. Abenduko zubian, Gabonetan, Inauterietan eta Pazko astean ez baitute irteerarik egingo.
Bi taldetan egingo dituzte ibilaldiak. Lehen taldea 10:30ean aterako da, eta herrian zehar bost kilometroko ibilbidea egingo dute. Bigarrenak, berriz, mugikortasun murritzagoa duten pertsonentzat pentsatutako kilometro bakarreko ibilbidea egingo du, 11:00etan abiatuta. Ibilbidean zehar, boluntario eta ikasleen laguntza izango dute parte hartzaileek. Izan ere, elkarte sozial, ikastetxe eta udalaren artean elkarlanean gauzatzen da egitasmoa. Aurten, besteak beste, Inmakulada Lanbide Ikastolak, Orixe institutuak, Laskorain ikastolak, Herrikide ikastetxeak, Tolosako OSIak, Iturriza Erretirodun Elkarteak, Goyeneche Fundazioak, Iurreamendi eta Uzturre egoitzek eta Nagusilanek parte hartuko dute.
Mugi Tolosak, ohitura osasuntsuak sustatzeaz gain, parte hartzaileen arteko sozializazioa ere bultzatzen du. «Zahartze aktiboa sustatzeko egitasmoa izateaz gain, topagune ere bihurtu da, lagunartean kalera ateratzeko eta ibilbideez gozatzeko aukera eskainiz», azaldu dute antolatzaileek. Hori horrela, asteazkenetako ibilaldiez gain, bestelako ekintzak ere antolatuko dituzte ikasturtean zehar: hondartzara irteera, Inauterietako kalejira, Tolosa-Ibarra VI. egitasmoa, Bizikletan adinik ez eta erorikoak ekiditeko gomendioen, bide-segurtasunaren eta belaunaldien arteko tailerrak.
Astelehenetan Alondegia plazan egiten diren jarduerei jarraipena ematea aurreikusten dute antolatzaileek. Hain zuzen, aurten egitasmora batu dira Tolosaldea Lanbide Heziketa Institutua eta Gainberri, saio horiek kirol ikasketetan murgilduta dauden ikasleek gidatzeko asmoz.