Tolosa&Co merkatarien elkarteak ordubeteko lanuztea egitera deitu ditu merkatariak. Biharko egin dute deialdia, 19:00etatik 20:00etara, eta ordu horretan Trianguloa plazan egingo dute mobilizazioa. Esan dutenez, herrian aspaldikoa da aparkalekuekin dagoen arazoa, eta udalarekin ere maiz bildu omen dira gaiaren inguruan hitz egiteko: «Denbora asko daramagu udalarekin biltzen aparkalekuen arazoaz hitz egiteko, baina ez dugu soluziorik jasotzen».
Tolosako merkatarien elkarteko kideek azaldu dute herriko komertzioak Tolosaldeko bezeroei esker «bizi» direla, eta horregatik dela garrantzitsua arazo horri irtenbidea ematea; «aparkalekuena konpondu gabe, eskualdeko bezero asko galtzen ari garela ari gara ikusten». Aparkalekuez gain, garraio publikoan dauden gabeziak ere nabarmendu dituzte.
Hala, aspaldiko eskaera dela kontuan hartuta, eta «ez dutenez ezer egiten» protestara jotzea erabaki dute. Komertzio txikia «itotzen» ari dela diote, eta irtenbideak behar dituztela «orain». Horregatik, geldialdiarekin bat egitera deitu dituzte komertzioak, eta Trianguloan elkartzera.