Esneki Euskal Herriko gazta eta esnekien azoka azaroaren 8 eta 9an egingo da. Tolosako Udalak, Hazik, Eusko Jaurlaritzak, Gipuzkoako Foru Aldundiak, Leartiker eta Esneki zentroak elkarlanean antolatutako ekitaldi honek, aurtengoan ere, esnekien azoka berezia eta Euskal Herriko Gaztarik Onena erabakitzeko lehiaketa hartuko ditu, besteak beste.
Parte hartzeko ekoizleentzako izen ematea ireki dute jada, eta eskaerak Esneki.eus webgunearen bitartez egin daitezke. Azokan postua jartzeko urriaren 11 baino lehen egin behar da eskaera, eta gazta lehiaketan izena emateko urriaren 18a baino lehen. Aurkeztu beharreko agiriak, bete beharreko baldintzak eta esleipen sistemaren inguruko informazio guztia bertan dago eskuragarri.
Azokari dagokionez, Euskal Herriko gazta, jogurta, izozki, krema, mamia eta orotariko esnekien ekoizleei irekita dago. Bestalde, Euskal Herriko gazta onena hautatzeko txapelketa, bederatzi mailatan banatuko da: gazta freskoak, gazta laktikoak, pasta bigunak, gazta urdinak, behi-gazta onduak, ahuntz-gazta onduak, ardi-gazta onduak, jogurtak eta behi esne pasteurizatua. Maila bakoitzean beste bi azpi-kategoria ere izango dira: alde batetik, gaztagileak berak ekoitzitako esnearekin sortutakoena; eta bestetik, hirugarren bati esnea erosi eta eraldaldatzen dutenena. Azpikategoria bakoitzeko saridun bat egongo da; eta ondoren, Txapeldunen txapelduna izango den gazta hautatuko dute.
Goxua
Urriaren 26an egingo da Tolosa Goxua, goiz guztian zehar. Egun handia izan ohi da gozozaleentzat. Aurtengo azokan parte hartu ahal izateko, urriaren 6a baino lehen eman behar dute izena gozogileek, udalaren egoitza elektronikoan. Tolosa Goxuan tradizio bilakatu den beste jardueretako bat postre lehiaketa da. Aurten, sagar tarta onena erabakitzeko lehiatuko dira parte hartzaileak. Interesdunek, egunean bertan utzi beharko dituzte Trianguloan, erabili eta botatzeko erretilu edo ontzi batean. Unean bertan egingo da izen ematea eta erabilitako errezeta aurkeztu beharko da. Parte hartzaileek, gutxienez, 18 urte izan beharko dituzte.