Ikasturte berria hastearekin batera, astelehenean zabalduko du Tolosako Udalak kultur etxeko gazte ikastaroetarako matrikulazio epea. Urtero moduan, eskaintza berritu egin dute, herriko gazteei askotariko jarduerak eskaintzeko. Ikastaro hauek urritik abendura bitarte eskainiko dira, euskara hutsean, eta 16 eta 35 urte bitarteko gazteei zuzenduta daude.
Hiruhileko honetako eskaintza hiru ikastaroz osatuta dago: Erleen mundua ezagutzeko ikastaroa, joskintza tailerra, eta dancehall-a.
- Erleen mundua ezagutzen: urriaren 16an hasi eta abenduaren 4an amaituko da. 2 orduko 8 saio izango dira eta asteazkenetan eskainiko dira, 17:00etatik 19:00etara. Izen-emateak 20 euroko kostua du.
- Joskintza: patroigintza eta moda diseinua izango ditu oinarri ikastaro honek. Urriaren 10ean hasi eta abenduaren 12an amaituko da. 2 ordu eta erdiko 8 saio izango dira, ostegunetan, 18:30etik 21:00etara. Izen-ematea 25 euro dira eta ikasleek josteko makina eraman beharko dute.
- Dancehall: ikastaro hau urriaren 11tik abenduaren 13ra bitarte eskainiko da. 2 orduko 8 saio izango dira, ostiraletan, 17:30etik 19:30era bitartean eta 20 euroko kostua du. Ikasleek arropa zein oinetako erosoak eraman beharko dituzte.
Matrikulazioari dagokionez, izen ematea aurrez aurre egin behar da kultur etxean, irailaren 16tik aurrera, 16:00etatik 20:00etara bitarteko ordutegian.